Demantstorgið

Natalía er ung stúlka sem hittir pilt á Demantstorginu í Barcelona, þau verða ástfangin og giftast. Lífið er enginn dans á rósum en erfiðleikar hversdagsins verða léttvægir í skugga spænsku borgarastyrjaldarinnar. Skelfingarnar dynja yfir og hungrið sverfur að; frelsisvonir hverfa og mannréttindi eru fótum troðin. Saga spænsku þjóðarinnar á hörmungartímum er hér sögð á meistaralegan hátt frá sjónarhóli alþýðukonu sem þarf að berjast ein og óstudd fyrir lífi sínu og barna sinna og leggur allt í sölurnar. Guðbergur Bergsson rithöfundur þýddi söguna úr katalónsku og ritar eftirmála.
Demantstorgið er eitt helsta snilldarverk katalónskra bókmennta á tuttugustu öld og hefur komið út á yfir þrjátíu tungumálum. Höfundurinn, Mercè Rodoreda (1909–1983), þurfti sjálf að flýja föðurland sitt í borgarastyrjöldinni og átti ekki afturkvæmt fyrr en eftir áratuga útlegð. Hún er oft talin fremsti rithöfundur Katalóníumanna á síðustu öld.