Popsongar

Tekstane i «Popsongar» tek oss med på ei fascinerande reise. På overflata er vi i løpet av 24 timar på 24 stader, og dei 24 historiene som blir fortalde, heng på eit finurleg vis saman med 24 songar.
Artistar som David Sylvan, Prefab Sprout, Bruce Springsteen, Pet Shop Boys, Bob Dylan og Roxy Music er knytt saman til kvar sine noveller. Men det musikalske bakteppet er på ingen måte eit vilkår for å leve seg inn i dei oftast triste, somtid tragikomiske, men alltid djupt menneskelege lagnadene i boka.
Felles for novellene er einsemd, mangel på ein plass å høyre til og identitetskriser. Frode Grytten har lagt handlinga i novellene til sterile, tomme og upersonlege stadar som hotellrom, flyplassar, barar og tog. Stadar der ein er, men likevel ikkje er. Stadar der mange menneske har vore før deg, men som likevel kjennast kalde og upersonlege.