Mannlíf milli húsa

Hin sígilda bók danska arkitektsins Jan Gehl Mannlíf milli húsa kemur út í sinni fyrstu íslenska þýðingu í nóvember 2018. Bókin, sem kom fyrst út á dönsku árið 1971 undir heitinu Livet mellem husene, hefur verið gefin út á tæplega fjörutíu tungumálum og er enn talin vera besta almenna ritið á sínu sviði.
​
Í rúmlega hálfa öld hefur arkitektinn Jan Gehl beint sjónum að hvunndagsathöfnum fólks í útirými borga. Í bókinni Mannlíf milli húsa, sem byggir á borgarlífsrannsóknum höfundar, eru athafnir fólks í almenningsrými greindar út frá eðli þeirra og eiginleikum. Í myndum og texta eru dregin fram þau margbreytilegu gæði sem felast í mannlífi borga og byggða og rýnt í forsendur út frá hönnun og skipulagi. Bókin, sem er skyldulesning í arkitektaskólum um allan heim, ætti að vera í handraðanum hjá skipulagsyfirvöldum, fagfólki, fjárfestum, þróunar- og uppbyggingaraðilum og öllum almenningi. Það var einmitt markmið höfundar með útgáfu bókarinnar á sínum tíma að gera þessa umræðuhefð aðgengilega fyrir sem flesta.

Upphaflega var Mannlíf milli húsa uppgjör við kaldranalegar borgir og íbúðahverfi eftirstríðsáranna. Síðan eru liðin tæp fimmtíu ár en bókin á ennþá fullt erindi eins og Jan Gehl kemst að orði í formála sjöundu dönsku útgáfu bókarinnar frá árinu 2017: „Undanfarnir áratugir hafa sýnt svo ekki verður um villst að viðleitnin til þess að styrkja mannlíf í borgum og byggðum er enn ofarlega á baugi. Samfélagsþróun og allir heimsins rafrænu miðlar hafa ekki dregið úr mikilvægi þess að fólk komi saman, nema síður sé.“