Saga listarinnar

Það er mikil kúnst að segja listasöguna frá örófi alda og fram á okkar daga þannig að lesendur skilji samhengið og séu með á nótunum. Enginn þykir hafa leyst þetta erfiða verkefni eins vel og prófessor E.H. Gombrich. Fer þar saman einstæð þekking á efninu og meistaralegir hæfileikar til þess að rekja söguna af látleysi, skilningi og virðingu þannig að hellaristur, nútímalist og allt þar á milli verður jafn ljóslifandi fyrir okkur. Sagan af tjáningarþörf mannfólksins verður ein órofin keðja.

Lesendur Sögu listarinnar skipta milljónum þar sem nær hálf öld er liðin frá fyrstu útgáfu hennar á ensku. Bókin hefur oftsinnis verið endurskoðuð og er þessi þýðing unnin eftir 16. útgáfu hennar.

Saga listarinnar eftir Gombrich hefur verið þýdd á 30 tungumál og talar sú staðreynd sínu máli um bókina. Hún hefur að geyma tæplega 400 litmyndir af málverkum, höggmyndum og merkum mannvirkjum, fornum og nýjum.

Halldór Björn Runólfsson listfræðingur þýddi.