Augu þín sáu mig

Smábær í neðra Saxlandi að næturlagi - er nokkur staður friðsælli og ólíklegri til tíðinda? En hvað ef þetta er á stríðsárunum og dularfullur maður er nýkominn á gistiheimili staðarins, þar sem meðal annarra þjónustustúlkan Marie-Sophie gengur til verka? Og hvernig getur stúlkan fagra orðið honum að liði?

Á þessum grunni rís ástarsagan sem Sjón hefur skrifað, spennandi, sögulega grunduð og dularfull í senn. Hugkvæmni höfundar og stílgáfa nýtur sín hér vel, um leið og hann sýnir á sér nýja hlið - hlið sögumanns sem hefur bæði tök á efni sínu og lesendum. Og sleppir ekki fyrr en yfir líkur.

Sjón hefur áður samið leikrit, ljóð og sögur, en „Augu þín sáu mig“ er stærsta verk hans til þessa.