Nos pagos de Huinca Loo

Unha novela ambientada nas duras terras patagónicas, protagonizada pola xeración dos fillos dos colonizadores nun tempo no que "o avanzar penoso das carretas fora substituído polo descaro veloz do ferro, o fume e o vapor".

Este é o libro co que Xavier Alcalá inicia o frutífero ciclo narrativo que o levará a converter as terras indómitas da Patagonia en grandioso escenario novelesco. En Huinca Loo, na pampa de bafo quente, entre pulperías, poeira, cabalos, chinas e guitarras, o fillo dun galego pioneiro na colonización daqueles inmensos desertos protagoniza unha peripecia vital marcada por difíciles dilemas.